My Poems in Vernacular
Hapus lang man tukladun ang Punta Nasog
Indi patas kang mala-Mt. Everest ko nga handum
Nga lab-uton ang putuk-putukan ka bukid
Kang imong pagpalangga.
Bisan mahapo makapahuway mangud takun
Agud pangbunuton sara-sara ang mga bariri
Kang imong mga tinaga,
nga nagapanuslok sa akun kasingkasing.
Garing kadya, indi mo run ako mahalitan
Hay damul run ang mga kugon sa pil-as
Nga sarang ko mapangarabutan.
Ang mga bariri indi ruman makadulot
Sa damul ko nga pantalon.
Indi run takun masakitan.
Bomba
Gintext ‘ta ikaw
kang nagluntad
ang pagpamomba
rugto sa Glorietta.
Nagkabalaka gid takun
hay basi sara ikaw
sa mga nasamaran
kang nagkaistampid.
Hay nga daan kuon mo
Pirme tinyo galagaw
Kon Biyernes sa Glorietta
Imaw kang imong mga abyan.
Ay abaw,
pagbalus mo sa akun text—
Pamatyagan ko takun
Ako ang nabombahan!
sa may iloilo airport
(samtang gahulat ka flight pa-manila)
gakunup ang ramig
sa akun kalawasan
bisan damul ang sweater
nga akun ginasuksok.
darwa run ka oras nag-agi
ang eroplano wara gihapon
kahugpa.
ginatamad gid lang takun
magpa-Manila.